My new site

Monday 27 April 2020

چین کی سڑک پر گھوڑے کا مٹر گشت

چین کی سڑک پر دلچسپ صورتحال اُس وقت دیکھی گئی جب گھوڑا مصروف سڑک پر آزادی سے گھومتا دکھائی دیا جس سے ٹریفک روانی متاثر ہوئی۔

یہ مناظرچین کے صوبے Zhejiang کے شہر Hangzhou میں دیکھے گئے جہاں ایک آوارہ گھوڑا اوور پاس کی سڑک پر دوڑ لگانے میں مصروف تھا۔

یوں سڑک کے بیچوں بیچ آزادی سے گھومتے گھوڑے کی وجہ سے جہاں ٹریفک کی روانی متاثر ہوئی وہیں کچھ لوگ اس منظر سے بےحد لطف اندوز ہوئے اور یہ مناظر اپنے کیمرے میں قید کرنے لگے۔

رپورٹ کے مطابق یوں گاڑیوں کے درمیان بھاگنے کی وجہ سے گھوڑے کو کوئی نقصان نہیں پہنچا جبکہ ٹریفک پولیس اہلکاروں نے گھوڑے کو پکڑ کر مالک کے حوالے کردیا گیا اور سڑک کلیئر کروادی گئی۔

Friday 24 April 2020

یوٹیلٹی اسٹورز انتظامیہ اور ملازمین میں ڈیڈلاک برقرار

یوٹیلٹی اسٹورز ملازمین کی ہڑتال کے معاملے میں مذاکرات کے باوجود یوٹیلٹی اسٹورز کے ملازمین اور انتظامیہ میں ڈیڈلاک برقرار ہے۔
چیئرمین یوٹیلیٹی اسٹورز یونین عارف شاہ نے کہا کہ انتظامیہ نے 2017-18 کے بقایاجات کی آئندہ مالی سال سے ادائیگی کی یقین دہانی کرائی ہے۔
انہوں نے مزید کہا کہ ہمارے ڈیلی ویجز اور کنٹریکٹ ملازمین گزشتہ کئی سالوں سے مستقل نہیں ہوئے ہیں۔
عارف شاہ نے یہ بھی کہا کہ ملازمین کی مستقلی تک ہڑتال جاری رہے گی تاہم طریقہ کار بدلنے کا سوچ رہے ہیں۔
یوٹیلٹی اسٹورز انتظامیہ نے کہا ہے کہ مذاکرات مکمل نہیں ہوئے تاحال مذاکراتی عمل جاری ہے۔
دوسری طرف یونین نے کارپوریشن انتظامیہ کے اعلامیے سے لاتعلقی کا اظہار کردیا ہے۔
اس سےقبل یہ اطلاع سامنےآئی تھی کہ مذاکرات کامیاب ہونے کے بعد یوٹیلٹی اسٹورز کھلنا شروع ہوگئے ہیں۔
یاد رہے کہ یوٹیلٹی اسٹورز یونین نے اپنے مطالبات منظور ہونے تک ملک بھر کے یوٹیلٹی اسٹورز رمضان سے ایک دن پہلے بند کردیے تھے۔
یونین کا کہنا ہے کہ تنخواہوں میں اضافے، ڈیلی ویجز اور کنٹریکٹ ملازمین کو مستقل کرنے سمیت دیگر مطالبات کی تحریری منظوری تک یوٹیلٹی اسٹورز کی بندش جاری رکھی جائے گی۔
منیجنگ ڈائریکٹر یوٹیلٹی اسٹورز کارپوریشن عمر لودھی نے کہا تھا کہ یونین نے حکومت کو بلیک میل کیا ہے، ان سے سختی سے نمٹیں گے۔
ایم ڈی یوٹیلٹی اسٹورز نے کہا کہ یونین نےحکومت کو بلیک میل کیا ہے، ملازمین نے ہڑتال فوری ختم نہ کی تو قانون حرکت میں آئے گا، اب یونین کا بھی خاتمہ کریں گے۔